Ein Cyf / Our Ref: TP                                                          

Dyddiad / Date: 23 Medi 2024                                                  

Gofynnwch am / Please ask for: Tim Peppin

Llinell uniongyrchol / Direct line:  07747 483761

E-bost / E-mail: tim.peppin@wlga.gov.uk

 

 

Cadeirydd – Pwyllgor Deisebau

Senedd Cymru

Bae Caerdydd

Caerdydd CF99 1SN

 

 

Annwyl Gadeirydd

 

Deiseb P-06-1380 Bathodyn Glas gydol oes i unigolion sydd â diagnosis gydol oes.

 

Diolch i chi am eich llythyr dyddiedig 17 Gorffennaf ynglŷn â’r ddeiseb uchod. Mae’n ddrwg gen i am yr oedi cyn ymateb, ond mae’r swyddogion wedi bod yn ceisio casglu gwybodaeth i gynnig atebion i’r cwestiynau a godwyd.

 

Er bod ystadegau wedi’u cyhoeddi am fathodynnau glas yn Lloegr (e.e. Blue Badge scheme statistics: data tables (DIS) - GOV.UK (www.gov.uk)), nid ydym yn ymwybodol o gyhoeddiad tebyg ar gyfer Cymru. Ymgynghorodd swyddogion CLlLC â Data Cymru ar hyn, ac maen nhw’n ymchwilio gyda Llywodraeth Cymru. Os byddan nhw’n cysylltu â ni gydag unrhyw wybodaeth bellach, byddwn yn siŵr o roi gwybod i chi.

 

Mae’r Gwasanaeth Digidol Bathodyn Glas (BBDS) yn darparu System Gwybodaeth Rheoli ar y we i bob Cyngor. Drwy’r BBDS, mae’n bosib cael gafael ar fanylion am ddeiliaid Bathodyn Glas o unrhyw le ym Mhrydain Fawr. Fodd bynnag, nid oes gan CLlLC fynediad at y BBDS ac mae’n aneglur os yw data cyfanredol yn cael ei dynnu o’r system honno a’i gyhoeddi yn rhywle ar gyfer Cymru.

 

O ystyried y sylwadau uchod, mae ymateb cryno i bob un o’r pedwar pwynt rydych chi’n eu codi i’w gweld isod.

 

(1) Nid oes angen data am faint o unigolion sy’n dal bathodyn glas gydol oes ar hyn o bryd ym mhob awdurdod lleol er mwyn mynd drwy’r broses adnewyddu lawn bob 3 blynedd.

 

Gan fod gofyn adnewyddu bathodynnau bob tair blynedd, ni chredwn fod yna unrhyw fathodynnau gydol oes, yn amodol ar y sylwadau a wnaed wrth ymateb i Gwestiwn 2 isod. Efallai y gall Cynghorau unigol egluro a oes yna unrhyw drefniadau lleol ar waith, ond nid yw CLlLC yn casglu na choladu gwybodaeth am y cynllun. Os nad yw Llywodraeth Cymru’n gwneud hynny, nid ydym yn ymwybodol bod y wybodaeth hon yn cael ei chadw mewn un lle, felly byddai angen holi pob Cyngor.

 

(2) Oes yna broses symlach o adnewyddu gydol oes ym mhob awdurdod lleol?

 

Mae gwefan pob Cyngor yn cynnwys gwybodaeth am y cynllun bathodyn glas a sut i wneud cais. Gellir gwneud hyn ar lein neu wyneb yn wyneb. Ar hyn o bryd, yn unol â chanllawiau Llywodraeth Cymru sydd wedi’u cyhoeddi ar gymhwyso (Bathodynnau Glas: pwy sy’n gymwys? [HTML] | LLYW.CYMRU), rhaid gwneud cais bob tair blynedd (a 12 wythnos cyn i’r bathodyn cyfredol ddod i ben). Fodd bynnag, efallai y gellir cymhwyso’n awtomatig heb fod angen asesiad os gellir dangos tystiolaeth o’r canlynol:

 

  1. Llythyr budd-dal cymwys, cyfredol gan yr Adran Gwaith a Phensiynau, wedi’i ddyddio o fewn y 12 mis diwethaf. Gall hwn fod yn llythyr hawl i gael Taliad Annibyniaeth Personol gyda’r adran bwyntiau neu’n llythyr cyfradd uwch elfen symudedd y Lwfans Byw i'r Anabl. Gall tystiolaeth arall gynnwys llythyr dyfarnu perthnasol gan y Weinidogaeth Amddiffyn (e.e. mewn perthynas ag Anhwylder Meddwl Parhaol) a thystiolaeth o fod wedi’ch ‘cofrestru’n ddall’ neu fod ag ‘amhariad difrifol ar y golwg’.
  2. Prawf o’ch cyfeiriad.
  3. Prawf o bwy ydych chi.

 

(3)Oes yna unrhyw gynlluniau hyfforddi cyffredin neu a rennir?

 

Mae Llywodraeth Cymru wedi cynnal hyfforddiant ac wedi rhannu gwybodaeth i Gynghorau am fathodynnau glas yn y gorffennol wrth gyflwyno newidiadau. Cafwyd canllawiau hefyd ar ddefnyddio bathodynnau glas yn ystod pandemig Covid. Yn fwy diweddar, cynhaliwyd sesiynau hyfforddi mewn perthynas â materion gorfodi bathodynnau glas.

 

 

 

(4)Oes yna unrhyw fforwm neu rwydwaith Cymru gyfan i rannu a datblygu arferion da?

 

Mae yna amrywiol rwydweithiau o swyddogion llywodraeth leol sy’n helpu i rannu arferion da ac a all gynnwys mentrau hyfforddi ar y cyd. Mae gwahanol adrannau’n ymdrin â bathodynnau glas mewn gwahanol Gynghorau (e.e. y gwasanaethau cymdeithasol; priffyrdd; canolfannau gwasanaeth i gwsmeriaid). Gall hyn ei gwneud yn anodd dod o hyd i’r rhwydwaith gorau i rannu gwybodaeth am fathodynnau glas. Fodd bynnag, canolfannau gofal cwsmeriaid, siopau un alwad neu ganolbwyntiau cymunedol a sefydlwyd gan Gynghorau ar gyfer y cyhoedd sy’n ymdrin â bathodynnau glas yn fwyfwy cyffredin. Mae yna Grŵp Cyswllt Cwsmeriaid allai gynnwys bathodynnau glas fel rhan o’u gweithgareddau rhwydweithio.

 

Gobeithio bod yr ymateb hwn o fudd i chi. Os byddwn ni’n cael unrhyw wybodaeth ychwanegol am y pwyntiau uchod, rwyf wedi gofyn i swyddogion CLlLC ei hanfon ymlaen atoch chi.

 

 

 

Yn gywir,

 

                   

               

Y Cynghorydd Andrew Morgan OBE    

Arweinydd a Llefarydd Cludiant CLlLC